Ил Түмэн спикерэ Петр Гоголев уонна дьокутаат Виктор Федоров ити тахсыбыт боппуруоһу мандаакка уонна регламеҥҥа хамыыһыйата көрөрүгэр эппитэ. Тустаах хамыыһыйа ити боппуруоһу бүгүн күнүс 2 чаастан көрдө. Мунньаҕы Ил Түмэҥҥэ мандаакка уонна регламеҥҥа хамыыһыйа бэрэссэдээтэлэ Андрей Николаев салайан ыытта. Андрей Николаев пленарнай мунньахха Ирина Высоких аадырыһыгар этиллибит тылы-өһү стенограммаҕа түһэрбиттэрин ааҕан иһитиннэрбитин кэнниттэн дьокутааттар санааларын эттилэр.
Бастакынан дьокутаат Виктор Федоров: «Петр Револьвович оннук-айылаах куруубай тылынын-өһүнэн саҥарбатах диэн сыаналыыбын. Ол эрээри, эдэр дьахтар аадырыһыгар сөбө суох тылы туһаммыт», -- диэн эттэ. Салгыы дьокутаат Сергей Никонов «Ханнык даҕаны куруубай тылы туһамматах эрээри, этикет өттүн тутуһар буоллахха, миниистир аадырыһыгар таҥаһа-саба сөп түбэспэтин туһунан эппиэтигэр баар”, -- диэн ыйда. Дьокутаат Алиш Мамедов боппуруоһу сонуну-киэҥник тарҕатар сириэстибэлэр аһары дарбаппыттарын бэлиэтээтэ. Маны сэргэ, дьокутааттар өрүү Ирина Высоких тыл этэригэр олус элбэх ыйтыыны биэрэллэр, санааларын этэллэр диэтэ. Ити барыта арыгылааһыны утары охсуһууну олус чугастык ылыналларыттан тахсарын ыйда. Дьокутаат Петр Револьвовичка тыл биэрбиттэригэр, “Бу күннэргэ мунньах видеотын үчүгэйдик сыныйан көрдүм, иһиттим. Хайдах эрэ соччото суохтук күүскэ эппит эбиппин. Биллэн турар, итини барытын пресса күүркэтэн таһаарда. Ирина Высокихха тус бэйэтиттэн бырастыы гынарыгар көрдөһөргө бэлэммин», -- диэн эттэ.
Мунньаҕы ыытааччы Андрей Николаев дьокутаат Петр Аммосов миниистир Ирина Высоких аадырыһыгар куруубай, нуормаҕа сөп тылынын-өһүнэн саҥарбыт дуо диэҥҥэ хамыыһыйа чилиэннэригэр куоластаппытыгар, үс дьокутаат «сөпсөһөбүт” уонна 4 дьокутаат “утарабыт” диэн куоластаатылар. Биир дьокутаат куоластыыртан туттунабын диэн аһаҕастык эттэ, оттон биир дьокутаат адьас куоластаабата. Онон регламент быһыытынан тустаах хамыыһыйа быһаарыыта тахсыбата. Мунньах түмүгэр, Андрей Юрьевич Петр Револьвовичка туһаайан, эр киһи быһыытынан бырастыы гыннараргын кэтэһэбит диэн тоһоҕолоото.
- 0
- 0
- 0
- 0
- 0
- 0