Алын кылаас үөрэнээччилэрэ балаҕан ыйын 1 күнүттэн саҥа бырагырааманан оҥоһуллубут ас менютунан аһыахтара. Бу манна доруобуйаҕа туһалаах уонна иҥэмтэлээх бородуукталар киирэллэр. Бу сыл түмүктэниэр диэри саҥа бырагырааманан оҕолору аһатыыны тэрийиигэ бүддьүөккэ 21,8 млрд солк. көрүллүбүт. Ол эрээри, билиҥҥитэ ханнык регионнарга бу үп тиксэрэ бигэргэтиллэ илик.
Роспотребнадзор оскуолаҕа аһааһыны тэрийээһиҥҥэ анаабыт этиилэринэн, кондитерскай аһылык, халбаһыы, саахар уонна туус аҕыйатыллыахтаах. Хомпуокка кутуллар саахар кээмэйэ кыччатыллыахтаах. Маны таһынан оскуолаҕа аһылыгы тэрийиигэ регионнар аһыыр уратылара эмиэ учуоттаныахтаах.
Биһиги Ил Түмэн үөрэххэ, наукаҕа, култуураҕа, көрдөрөр-иһитиннэрэр средстволарга уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышеваттан бу боппуруоска быһаарыы биэрэригэр көрдөстүбүт:
-- 2020 сыл балаҕан ыйыттан 2023 сылга диэри оскуола остолобуойугар үөрэнээччилэри доруобуйаҕа туһалаах босхо аһынан аһатыыны тэрийии үлэтэ түһүмэхтэринэн ыытыллыаҕа. Бу сыалга федеральнай бүддьүөттэн судаарыстыбаннай көмө көрүллэрин ситиһэргэ үлэлэһэбит.
Оскуолаларга доруобуйаҕа туһаалаах аһы тэрийиигэ улахан үлэ барыахтаах. Холобур, оскуола остолобуойдарын сөптөөх оборудованиенан, хаачыстыбаннай бородууктанан хааччыйыахтаахпыт. Билиҥҥитэ алын кылаас оҕолорун доруобуйаҕа туһалаах аһынан аһыылларын ситиһэргэ, оскуолалар остолобуойдарын хааччыйыыга ыытыллар үп суота быһаарылынна. Култуура, спорт уонна физическай култуура, юстиция министиэристибэлэрин уонна прокуратураны кытта бигэргэммит Ил Дархан “Оскуола оҕолорун аһылыгын тэрийиигэ ороскуот нуорматын быһаарыы туһунан” ыйаах бырайыага оҥоһуллан, билигин Үп министиэристибэтигэр көрүүгэ баар.
-
0
-
0
-
0
-
0
-
0
-
0
