Ыалдьыбыт дьону таһарга авиахампаанньа Ан-26, Ан-24, Л-410 сөмөлүөттэри уонна Ми-8 бөртүөлүөтү анаабыт. Пациеннары анал бокска уган таһаллар, быраастар булгуччу ыалдьыбыт киһини арыаллыыллар. Ыалдьыбыт киһи сытар боксата чиҥник оҥоһуллубут, ол иһин быраас уонна экипаж ыарыыга сутуллара уустук.

Рейс кэнниттэн көтөн кэлбит сөмөлүөт эбэтэр бөртөлүөт күүстээх дезинфекцияны ааһар. Ол курдук, пандемия саҕаланыаҕыттан “Полярные авиалинии” авиахампаанньа 180 рейс оҥорбут, 380 ыарыыга хаптарбыт киһини таспыт.

Ааспыт сууккаҕа 210 киһи дьаҥынан ыалдьыбыт. Дьокуускайга – 122, Алдаҥҥа – 11, Сунтаарга – 8, Ньурбаҕа, Нерюнгрига, Уус Алдаҥҥа, Чурапчына – 6-лыы киһи, Бүлүүгэ, Мэҥэ хаҥаласка, Өлөөҥҥө – 5 -тии киһи, Аммаҕа, Горнайга, Эдьигээҥҥэ, Тааттаҕа – 4-түү киһи, Анаабырга, Ленскэйгэ, Өймөкөөҥҥө – 3-түү киһи, Мирнэйгэ, Хаҥаласка – 2-лии киһи уонна Аллайыахаҕа биир киһи ыалдьыбыт. 3 киһи коронавирус ыарыытыттан суорума суолламмыт.