Кырдьык, култуурунай нэһилиэстибэ диэн норуот бэйэтин олоҕунан, айымньылаах үлэтинэн айан, олохсутан хаалларбыт сыаннастара, духуобунай таhымҥа өйдүүр, ылынар уонна көлүөнэттэн көлүөнэҕэ тиэрдэн иһэр ытык өйдөбүллэрэ ааттаналлар. Ол аата олоҥхобутуттан, суруйааччыларбыт айымньыларыттан саҕалаан, пааматынньыктарга, түмэл экспонаттарыгар, таҥаспытыгар-саппытыгар тиийэ ити хайысхаҕа киирэр.

Владислав Валерьевич Арассыыйа таhымыгар биллэриллибит сылы Сахабыт сиригэр тэрийэн ыытыы эппиэтинэһэ министиэристибэҕэ сүктэриллибитин иһитиннэрдэ. Маныаха кылгас кэм иһигэр былаан барыла таҥыллыахтаах эбит. Хас биирдии бөдөҥ култуура уонна ускуустуба тэрилтэтэ, биэдэмистибэ, улуус дьаһалтата сэргэх этиилэрин, сонун көҕүлээһиннэрин ыытар эбээһинэстэммит. Киирбит этиилэри Бырабыыталыстыба анал хамыыһыйа тэрийэн, сыымайдаан, көрөн-истэн, ый кэриҥинэн бигэргэтиэхтээх эбит. Ол иннигэр киирэр этиилэр бытархай тэрээһиннэринэн тарҕаммакка, оруннаах уонна ис хоһоонноох буолалларыгар болҕойор наадатын эттэ Владислав Левочкин.

Биллэн турар, дойду таһымыгар эмиэ далааһыннаах былаан ылыллыаҕа, тэрийэр хамыыһыйа олохтонуоҕа. Урукку өттүгэр тус туһаайыылаах сыллары тэрийэргэ бэдэрээлинэй киинтэн бырагыраамалар истэринэн уонна биирдиилээн бырайыактарга үп, оборудование, ресурс көрүллэр буоллаҕына, бу да сылга оннук ньыма баар буолуоҕар эрэнэбит.

Мунньах кыттыылаахтара култуурунай нэһилиэстибэ сылын биир эрэ сыллаах дьаһал курдук ылыммакка, бу сылтан ааттаммыт хайысхаҕа тиһиктээх уонна туһаайыылаах үлэ-хамнас тэриллэрин быһыытынан өйдүүр тоҕоостооҕун бэлиэтээтилэр. Сүрүнэ диэн, былааһы, дьону-сэргэни бэйэтин бу сыалга-сорукка кыттыһалларыгар, өйдөөн-төйдөөн, суолталааҕын ылынан туран, туох эрэ үтүө дьыала, саҕалааһын баар буоларыгар турунуохтаахпытын санаттылар.

Арассыыйаҕа 2019 сыллаахха Тыйаатыр сылын тэрийэн ыытар хамыыһыйа чилиэнэ Андрей Борисов оччолорго Саха сирин тыйаатырдарын гостуруолларын марафонун көҕүлээбитэ үгэскэ кубулуйан, билигин бэдэрээлинэй бырагырааматтан үптээх туспа хайысхаҕа, дьаһалга кубулуйбутун санатта. Итиэннэ өрөспүүбүлүкэ дойду таһымыгар туох саҥа санааны күөрэтэригэр болҕойон толкуйдуурга уонна уһаппакка этиилэри ыытарга ыҥырда.