Никифор Протопопов диэн Өймөкөөн улууһун Томтор сэлиэнньэтин олохтооҕун уоллаах кыыһа Дьокуускайга айанньаабыттар.

– Томтортон 120 көс тэйбиттэрин кэннэ, түүн 22 чаас саҕана, массыыналара умуллан хаалбыт. -50 С кыраадыстаах хабараан тымныыга оҕолорум суол ортотугар олорон хаалбыттар, – диэн аҕалара кэпсээбит.

Хата, дьолго, ити түүн Уус Ньараттан Томторго улуустааҕы суол инспиэксийэтин начальнига Петр Беляев кэллиэгэлэрин кытта төннөн испит. Аара суолга иэдээҥҥэ түбэспит эдэр дьону булан, Үчүгэйгэ диэри массыыналарын соһон илдьэн биэрбиттэр. Оттон кыыһы Томторго тиэрдибиттэр.

Аҕалара Никифор Никифорович оҕолорун өлүү-сүтүү ытарчатыттан төлө тардан ылбыт суол инспиэксийэтин үлэһиттэригэр хаһыат нөҥүө махталын тиэрдибит.

Билигин Саха сирин үрдүнэн уһулуччу тымныы күн-дьыл турар. Онон айанньыттар суолга-иискэ сэрэхтээх, болҕомтолоох буолалларыгар ыҥырабыт. Торулас тымныыга иэдээн сэрэппэккэ кэлэр.