«Муниципальнай тэриллиилэр Устааптарын судаарыстыбаннай регистрацияларын туһунан» федеральнай сокуоҥҥа уларытыы киллэрии туһунан» сокуоҥҥа муниципальнай тэриллии Устаабын электроннай ньыманан регистрациялааһын бэрээдэгэ чопчуламмыт. Бу докумуоннар РФ юстициятын министиэристибэтин сайтыгар киллэриллиэхтээҕэ ыйыллар.

«Тырааныспарынан дьону таһыыны хонтуруоллааһын уонна ону толоруу бэрээдэгин кэһии иһин эппиэтинэс туһунан» федеральнай сокуоҥҥа уларытыы киллэрии туһунан» сокуон үлэлээтэ. Мантан антах дойдулар икки ардыларыгар дьону таһар тырааныспарт үлэтин хонтуруоллааһын күүһүрэр. Ол курдук, РФ кыраныыссатын туораабыт омук нүөмэрдээх массыына суол быраабылатын кэһиитигэр ууруллубут ыстарааптардаах буоллаҕына, бу ыстарааптары төлөөн эрэ баран бэйэтин дойдутугар тахсар кыахтанар.

«РФ омук гражданнарын бырааптарын балаһыанньаларын туһунан» федеральнай сокуонугар гражданнар нуучча тылын, Арассыыйа устуоруйатын , РФ сокуонун билиилэрин быһаарар боппуруостар чопчуламмыттар.

Нуучча тылын Арассыыйа устуоруйатын билэллэрин туоһулуур сэртипикээт РФ территориятыгар бэриллэр, эбэтэр тас дойдуга бэриллэр буоллаҕына, тустаах бигэргэммит эксээмэни тутар үөрэх тэрилтэтэ биэрэр. РФ Бырабыыталыстыбата омук гражданнара нуучча тылыгар, устуоруйатыгар, сокуону билиигэ эксээмэни тэрийии ньыматын, бэрээдэгин, ирдэбилин уонна болдьоҕун бигэргэтиэхтээх.   

Эксээмэни туттаран, Арассыыйаҕа үлэлииргэ, олорорго көҥүллүүр сэртипикээт болдьоҕо үс сыл устата үлэлиир. Оттон олорорго көҥүллүүр сэртипикээт болдьоҕо суох.

Рособрнадзор эксээмэннэри тутуу ирдэбилин толорууну хонтуруоллуоҕа. Ол курдук, үлэлииргэ көҥүл ылар омук киһитэ дьон нууччалыы иһитиннэриитин өйдүөхтээх, үлэтигэр, социальнай-култуурунай эйгэҕэ сыһыаннаах тиэкистэри сатаан ааҕыахтаах, анкеталары, бланкалары уонна атын докумуоннары сатаан толорор, сайабылыанньалары суруйар буолуохтаах.

«Парламентская газета» хаһыаттан.